بكل صراحة !!

[English Advisor]

السلام عليكم و رحمة الله و بركاته

عندي موضوع محيرني من فترة أتمنى إني ألقى له جواب عندكم !!

ربي يسلمكم في الماضي تعودوا إبهاتنا خلال رحلاتهم التجارية بالعودة بزوجات أجنبيات سواء من آسيا و غيرها من الدول -لا أقصد العربية، فجميع العرب تجمعهم روابط العروبة و الدين و التاريخ و المصير المشترك-

هذه الظاهرة لا زالت تتكرر في مجتمعتنا الخليجية و العربية على حد سواء

غرضي من إثارة هذه النقطة هو :

أن الآباء بيدهم حرية إختيار الزوجة و لكن الأبناء هم من يدفعون الثمن ، سواء من تأثر بعادات و لغة و معتقدات أو من غيرها من الآمور

أحد هذه الأمور زواج الأبناء ، في أكثر من حادثة تكررت يرفض أحد الطرفين أو ذويهم تزويج الطرف الآخر لمجرد أن الأم أجنبية أو آسيوية؟؟

إلى أي مدى برأيكم يجب الأخذ بعين الاعتبار أصل و فصل الأم خاصة إذا كان هذا الطرف -شاب أو فتاة- على قدر عال من الدين و الأخلاق ؟؟

أتمنى التفاعل بصراحة من الجميع...


قبل الختام

استحضرني مثل يتوارد في مجتمعاتنا

المرء من حيث يثبت لا من حيث ينبت و من يحث يوجد لا من حيث يولد


أترككم في حفظ الله و رعايته

[الســاحــر]

وعليكم السلام ورحمة الله وبركاته


نورتي قسم الحوار اختي

بداية مميزة وموضوع حساس وحيوي وظاهره لها اثار كثيره على مجتمعنا

على العموم حبيت اسجل حضور الإعجاب ببساطة طرحج

ولى عودة إن شاء الله

تحياتي وتقديري

اخوج الساحر

[ghallya]

السلام عليكم ورحمة الله وبركاته ،،

عاش من شافج في المنتدى عزيزتي .. نورتي ..

الصراحة موضوع جريء ويستحق الوقوف والنقاش فيه ..

كل اللي ذكرتيه في الموضوع صحيح .. من ناحية ان العيال هم اللي يكونون الضحايا .. بلا ذنب او اختيار ..

لكن في نفس الوقت .. هذا شيء مقدر من الله ..

واذا بنتكلم عن غلطة منو ومنو .. بندخل في امور بعيدة عن الموضوع الاساسي اللي هو المشكلة الاجتماعية اللي ناتجة من هالزواجات ..

يعني لو نكون واقعيين ياعزيزتي .. في حديث للرسول عليه الصلاة والسلام يقول ( تخيروا نطفكم فإن العرق دساس )

يعني شي طبيعي عند العرب انهم يحاتون عيالهم بياخذون من وين ومن منوو :)

واذا بنتكلم عن الاباء ايام التجارة يتزوجون الاسيويات .. للاسف للحين الشباب يتزوجون اجنبيات عشان الرخص والبطرة !!

يعني مالها علاقة العادات اللي سارية .. وايد ظروف تقدر تخلق هالمشكلة الاجتماعية ..

وفي كلا الحالتين .. مانقدر نلوم شخص محدد .. مابيدنا غير ندعي لهالعيال ..

في ناس في الحقيقة والواقع ماعندهم .. اشكالية بتزويج عيالهم من هالفئات لان في النهاية ..

كل انسان وشخصيته وتربيته :) .. هب بأصل امه او ابوه ..

وكل انسان يثبت نفسه بأخلاقه العالية .. ومثل مايقولون .. المعدن الاصيل ..يبـان ..

::

في شي احب تطرق له بما ان فتحنا هالموضوع ..

وهو اعتقاد الناس وظنونهم من الاشياء اللي شافوها من الزوجات الاجنبيات من مشاكل ..

يعني يا كثر المغربيات اللي سوو لريايلهن اعمال .. واهله .. واختلقوا مشاكل مالها نهاية ..

وغيرهن وغيرهن .. وهالشي يخلي الناس يتعقدون وينفرون من عيالهن .. وبالتالي مايرضون يزوجون عيالهم منهم ..

طبعا هذا مثل واحد .. اكيد في اشياء ثانية تخلي الناس تتجنب تزويج عيالهم من عيال الاجنبيات ..

بس ترا العكس ايضا يحذث .. لو شاب امه اجنبية .. يرفض الاهل تزويج بنتهم له بسبب امه !

وهالشي غريب واعتبره ظلم .. لكن مانقدر نقول غير الله يعين ويصبرهم :)

وهاذي حقائق مؤسفة .. مانعرف متى بتتلاشى .. ماعلينا غير نتقبلها ونحاول نتعايش وياها بالمنطق والتي هي احسن ..

السموحة عالاطالة وشاكرة لج حضورج الرائع

وداعة الله

[الســاحــر]

السلام عليكم ورحمة الله وبركاته


موضوعج اختي الكريمة من المواضيع الحساسه والواقعيه فى

مجتمع الامارات بشكل خاص....

ومثل ما تفضلتى فالأبناء ما لهم ذنب لإعتبارات واختيارات

الأهل...فهذا الامر خارج عن حسبتهم وقدرتهم

على استيعابه...


وصحيح بان الاوليين كانت لهم جولاتهم وتجارتهم وخص

للدول الاسيويه منها الهند وباكستان وفارس...ونتيجة

لذلك نلقى الازواج مرتبطين بزوجات من تلك الدول ..

ويمكن يكون الزواج الثاني او الثالث بالنسبة لهم..

فى الاخير الابناء اللى يعيشون فى اسره مكونه من اب

مواطن وام اجنبيه تتغير نظرتهم لبعض الامور يوم يكبرون

نظرا للاعتبارات السائدة فى مجتمعات الخليج وهى

اعتبارات قبلية بالدرجة الاولى تتدرج منها العادات

والتقاليد والنسب....


اعتقد التكافؤ مطلوب فى الزواج ..فسمعت شباب مواطنين

امهاتهم من الهند وغيره ويفضلون زوجات من نفس

المستوى الاجتماعي وخص النسب فبيكون هذا حل

مقبول ..واشوف التكافؤ لازم ينظرله الف حساب في

مسالة الزواج والارتباط..


الانسان هب عايش لنفسه عنده اهله اللى شال

اسمهم فلازم ياخذ في الاعتبار مثل هالامور وما

يكون اناني...والتراضي خير الحلول...

وحاليا اعتقد انه دمج المواطنين اللى امهاتهم

اجنبيه موجود يعني هم مب من المريخ ولا من كوكب

ثاني كلهم منصهرين فى مجتمع واحد وعايشين

على ارض وحده واكيد يجمعهم حب هالارض سواء ان

كانت امهم اجنبيه او مواطنه...

بس هالحال ما ينطبق على الابناء من امهات مواطنات

واباء وافدين فهذا موضوع ثاني.....



والسموحه


تسلمين على الموضوع

اخوج الساحر

[بوحميد]

و عليكم السلام و رحمة الله و بركاته ..

طرح جميل و مميز :)

و مشكله من المشاكل الموجوده فعلا في مجتمعنا و متواصل الحدوث بشكل إنه قبل يوم كنت اسمع عن فلان انه امه هنديه أو أوروبية كنت أستغرب، لكن الحين قمت أشوفه شي عادي من كثرهم .. يعني السنه الي طافت في الكلية كنا 15 نفر في الكلاس .. و 3 من الـ 15 امهاتهم أجنبيات ..


و أيضا من وجهة نظري، هذي المشكله أقصى خطورتها مب وقت الزواج .. لأن الزواج يتدبر .. لكن الخطورة وقت وفاة الريال .. الزوج .. من بيتم ويا العيال ؟ الأم الأجنبية .. يعني اذا يت تبا تتزوج مره ثانيه .. من أقرب واحد بتاخذه ؟ أكيد بيكون واحد من جنسيتها لأنه صعب جدا يي فرد ثاني من المجتمع و ياخذها مره ثانيه. يعني في هالحاله التربية راح يختل توازنها و شي لا شك منه نهاية محزنة.

و بالنسبة للسؤال المطروح :

إلى أي مدى برأيكم يجب الأخذ بعين الاعتبار أصل و فصل الأم خاصة إذا كان هذا الطرف -شاب أو فتاة- على قدر عال من الدين و الأخلاق ؟؟

هالشي طبعا يعتمد على الأب و الأم للزوج و الزوجة .. المتعلم و المتثقف بيختار الدين لاشك .. لكن الجاهل و المتعصب بيختار النسب .. عسب يوم يذكرون ولده يقولون " خذ بنت فلان " .. و بعض الناس همهم كلام الناس لو كان على حساب راحته و راحة عياله :) ..


و آسفين عالإطالة :) ..

اخوكم بوحميد :)

[English Advisor]

ربي يجزيكم الخير ع مروركم الكريم و تفاعلكم ف الموضوع